எந்த மொழி நம் மொழி ?

நீங்கள் வீட்டில் பேசும் மொழி என்ன?

என் வேர்களை கணிக்க முடியாத 

அம்புஜம் என்னிடம் மெல்லவே வினவினர் .

தமிழும், ஆங்கிலமும் ,ஹிந்தியும் ,மலையாளமும் 

அவியலாக எங்கள் நாவில் நடமாட 

என் இல்லத்தில் எந்தநேரமும் நிறைந்திருக்கும் 

உன்னத மொழி ஒன்று உண்டு 

அதன் பேர் மௌனம் .

என் மௌனம் உனக்கும் 

உன் மௌனம் எனக்கும் என்றுமே  அத்துப்படி .

உன் செல்ல மௌனம் ,கோப மௌனம் 

இயலாமை மௌனம்,நேச மௌனம்

எரிச்சல் மௌனம் ,பசி மௌனம் 

எதுவுமே எனக்கு புரியாமல் 

என்னை கடந்து போவதில்லை ,

என்  மௌனங்களும் உன் 

விரல் நுனியில் நடனமாடுகிறது .

மௌனத்தை வாழ்வியலாகவே 

நேசிக்கும் நமக்கு 

வார்த்தைகளும் மொழிகளும் 

சிலநேரம் அன்னியப்பட்டு போகிறது .

இதனால் தானோ ஓயாமல் பேசும் 

அம்புஜத்தை கண்டால் 

நீயும் நானும் ஓடி ஒளிகிறோம் !!!